সুন্দৰৰ সুখ। অমূল্য বৰুৱা
সুন্দৰৰ সুখ
–অমূল্য বৰুৱা
কোনেনো বজালে বাঁহীটি কালি
সুৰ সুষমাৰ লহৰ তুলি
হিয়াই হিয়াই মিলি জুলি
গোপন পৰত ঐ।
কোনো কাহানিৰ আবেগ ভৰা
অভিমানত সপোন সৰা
কোন প্ৰাণৰ সমল হৰা
সুৰ চানেকী লই।
বুকুৰ ব্যথা বুকুৰ কথা
মনে প্ৰাণে সুৰে গঁঠা
কিবা এটি কিবা কথা
কাণে কাণে থই।
দুৱৰীয়ে দুৱাৰ মুখত
আপোন ভুলা প্ৰাণৰ সুখত
কাৰনো বাৰু সুৰ শুনিলত
থমকি থমকি ৰ’ই।
কোন বলিয়াই বজায় বাঁহী
ভবা কথা বুকুত ভাঁহি
হিয়া ভৰি হাঁহি হাঁহি
মৰম কণা লয়।
নিজেই হাঁহি বজায় বাঁহী
নিজৰ প্ৰাণত নিজেই ভাঁহি
কঁপাই কঁপাই ওঁঠৰ পাহি
নিজেই নিজৰ প্ৰাণ।
মিছাকৈয়ে লোকক সোধে
কোনে জানে? কোনে বুজে?
প্ৰাণৰ সুৰ প্ৰাণক সুজে
কৰি অভিমান।
কোনে বুজে কিয় বাজে
মনে প্ৰাণে কিয় ৰাজে
মিলি জুলি সুৰে সাজে
আলোক সোণাই প্ৰাণ।
কোনে বুজে কিয় আনে
সুখৰ সপোন প্ৰাণে প্ৰাণে
কদম তলৰ কাণে কাণে
মোহন বাঁহীৰ তান।
সপোন জালত মনে মনে
ঘূৰি ফুৰোঁ বনে বনে
কিয় জানো ঘনে ঘনে
মুখত ফুটে গান।
বুকুত চপাই ফুলৰ কলি
ওঁঠে চুমাই পৰি ঢলি
হেঁপাহ পুৰাই মনৰ অলি
সুখৰ অভিমান।
আৰু কিবা লগে লগে
হিয়াখনি ভাগে ভাগে
কোনে বুজে আগে আগে
কিনো লৰি যায়।
সোণৰ হৰিণ ডিঙি ভাঙি
চকু যুৰি দাঙি দাঙি
মনত কিনো কথা পাতি
ঘূৰি ঘূৰি চায়।
ৰামে সীতাই কথা পাতে
কাণে কাণে বাটে-ঘাটে
ফুলে ফুলে জানে জানে
ফুটে কিহৰ মাত।
সপোন ভাঙি সপোন ৰচে
চকুৰ পানী কিয় মচে
পাতে পাতে গছে গছে
কিনো সুৰৰ জাত।
চিত্ৰলেখাই ছবি আঁকে
লিখনিয়ে পাকে পাকে
প্ৰেমৰ মোহন ৰহণ বাকে
বুকুত লগাই বোল।
কোনে জানে সোণৰ ছবি
কেতিয়াকে পূৰা হবি
উষাই তাকে ভাবি ভাবি
ফুলাই আশাৰ ফুল।
পদুম পাতত ছবি আঁকি
গোপন হিয়াৰ সপোন চাকি
চকুৰ পানী কোনে বাকী
দিয়ে হিয়া দান।
চালি ধৰ ম’ৰা পখী
ক’ত কিনো কলে সখী
অকলশৰে বহি বহি
কিয় জানো নিজে নিজে
ললে অভিশাপ।
তাহানিৰ আঙঠিটি
মনৰ কথা আছিল সিটি
সিও গল কেনি উটি
কিনো জানো পাপ।
সোঁতে সোঁতে উটি উটি
গুচি গলে হিয়া দুটি
কত কথা মনত ৰাখি
আনিম বুলি প্ৰাণ।
ক’ত কথা ললে সুধি
পিছে পিছে সাজি বুদ্ধি
আৰু মাথো এটি বাকী
প্ৰাণক প্ৰাণৰ দান।
সপোন দেখি সপোন লেখি
সুৰে সুৰে ময়ো সখী
মেলি দিলো মৰম পাখী
কিবা এটি পাম।
কিয় জানো নিঠুৰ বেলা
আশাৰ শেষৰ খেলা
মনে মনে পাহি মেলা
কিনো আজি চাম।
কোনে জানো ভাঙি সপোন
খুলি দিলে হিয়াৰ দাপোণ
মৰম সনা ছবি আপোন
অকণি হিয়াৰ দান।
তুমি সখী নহয় তুমি
ময়ো কিবা চুমা চুমি
কিহৰ জানো জুমা জুমি
হায়! কান্দি উঠে প্ৰাণ। ০ ০ ০
সুন্দৰৰ সুখ
বিঃ দ্রঃ অমূল্য বৰুৱাৰ উক্ত ‘সুন্দৰৰ সুখ | Sundoror Sukh’ শিৰোনামৰ কবিতাটি ৰাব্বি মছৰুৰ সম্পাদিত ‘অমূল্য বৰুৱাৰ প্রতিনিধিত্বশীল কবিতা’ গ্রন্থৰ পৰা লোৱা হৈছে। সুন্দৰৰ সুখ
You May Like:
অতিৰিক্ত অনুসন্ধান:
- মৌলানা আবুল কালাম আজাদ
- হুমায়ুন আজাদ
- অসমীয়া কবিতা
- হীৰেন ভট্টাচার্যৰ এমুঠি কবিতা
- ইছমাইল হোছেইন
- বিষ্ণু ৰাভাৰ গীতি কবিতা
- জ্যোতিপ্রসাদ আগৰৱালাৰ কবিতা
- অমূল্য বৰুৱাৰ কবিতা কুকুৰ
- অসমীয়া আধুনিক কবিতা